अनेसासले मुख्यमन्त्रीलाई गर्‍यो अभिनन्दन, कार्बीआङलङ शान्ति सम्झौतामाथि भयो चर्चा

 

गुवाहाटी,२८ जुन: असम नेपाली साहित्य सभाको केन्द्रीय प्रतिनिधि मण्डलले आज गुवाहाटीमा असमका मुख्यमन्त्री डा. हिमन्त विश्व शर्मालाई अभिनन्दन गरेको छ। प्राप्त जानकारी अनुसार, अनेसासको टोलीले एउटा अभिनन्दन पत्र, खुकुरी र ढाका टोपीले मुख्यमन्त्रीलाई अभिनन्दन गर्दछ। उक्त टोलीमा अनेसासका सभापति दुर्गा खतिवड़ा, कार्यकारी सभापति तथा विश्वनाथ महाविद्यालयका अध्यक्ष डा. चिन्तामणि शर्मा, महासचिव रुद्र बराल, शिक्षा सचिव डा. खगेन शर्मा , साहित्य सचिव ढाकाराम काफ्ले र विश्वनाथ महाविद्यालयका प्राध्यापक चन्द्रमणि शर्मा  सामेल थिए।

उक्त टोलीले मुख्यमन्त्री राहत कोषमा ५१ हजार रुपियाँको अर्थिक सहयोग पनि पुर्‍याएको छ।

मुख्यमन्त्री र अनेसासको टोलीबिच कार्बीआङलङमा हुन गइरहेको तृपक्षीय शान्ति सम्झौतामाथि पनि छलफल भएको थाहा लागेको छ। अनेसासको टोलीले शान्ति सम्झौतामाथि मुख्यमन्त्रीको ध्यानाकर्षित गराउँदै सम्झौताले त्यस क्षेत्रमा बसोबास गर्ने गोर्खा जनताले केही असुविधा भोग्नु नपरोस् भनी आग्रह प्रकट गर्दछन् भने मुख्यमन्त्रीले सकारात्मक जवाफ दिएको कुरा अनेसासका महासचिव रुद्र बरालले बताएका छन्।

अर्कातिर, अनेसास केन्द्रीय समितिको प्रतिनिधि मण्डलले आज असम विधानसभामा आफ्नो‌ मातृभाषामा शपथ ग्रहण गरी असमका गोर्खाहरुलाई गौरवान्वित गर्ने बरसोला विधानसभा क्षेत्रका विधायक गणेश कुमार लिम्बू र गोर्खा उन्नयन परिषद्, असमका अध्यक्ष प्रेम तामाङ्गलाई पनि भेट गरी अभिनन्दन ज्ञापन गरेको छ।