असममा भव्यताका साथ सामूहिक भाइटीका 2024 सम्पन्न: अखिल असम गोर्खा छात्र संघद्वारा सांस्कृतिक एकताको सन्देश

"असममा भव्यताका साथ सामूहिक भाइटीका 2024 सम्पन्न: अखिल असम गोर्खा छात्र संघद्वारा सांस्कृतिक एकताको सन्देश"

गुवाहाटी, 3 नोभेम्बर, Nelive24: अखिल असम गोर्खा छात्र संघ (आग्सु) केन्द्रीय समितिको नेतृत्वमा यस वर्षको सामूहिक भाइटीका 2024 एक ऐतिहासिक उत्सवको रूपमा मनाइएको छ। गुवाहाटीको पल्टन बजारस्थित गोर्खा ठाकुरबारी नेपाली मन्दिर प्रांगणमा आयोजित यस कार्यक्रमले असमभरका गोर्खाहरुको एकता, भाइचारो, र सांस्कृतिक समर्पणलाई उजागर गरेको छ।

यस विशेष कार्यक्रमको उद्घाटन असम नेपाली साहित्य सभाका सभापति श्री दुर्गा खतिवडा र असम लोकसभा आयोगका सदस्य श्री देवराज उपाध्यायले दीप प्रज्वलन गर्दै गरे। उपस्थित स्थानीय कलाकारहरूले भैली नृत्य प्रस्तुत गर्दा सम्पूर्ण वातावरण सांगीतिक र सांस्कृतिक बन्दै गयो। असमका चर्चित गायक नर बहादुर दर्जीले देउसी गीत र भूपेन हाजरिका जस्ता महान कलाकारका गीतहरू प्रस्तुत गर्दा सहभागिहरू सांगीतिक तरंगमा रमाए।

कार्यक्रमको मुख्य आकर्षण सामूहिक भाइटीका थियो, जहाँ स्थानीय चेलीहरूले अतिथिहरूलाई भाइटीका लगाएर भाइटीकाको परम्परालाई जीवित राखे। भाइटीकाको महत्त्वलाई अझ बढी प्रकट गर्न, अखिल असम छात्र संघका मुख्य उपदेष्टा डा. समुज्जल कुमार भट्टाचार्यले आग्सुको नयाँ वेबसाइट सार्वजनिक गर्दै युवाहरूलाई आफ्नो परम्परामा गर्व गर्न प्रेरित गरे।

अन्य प्रमुख अतिथिहरूमा अखिल असम गोर्खा छात्र संघका पुर्व सभापति श्री भास्कर दाहाल, अखिल असम गोर्खा छात्र संघका सल्लाहकार श्री बीरेन्द्र सुब्बा, गुवाहाटी पौर निगमका अध्यक्ष श्री मृगेन सहरिया, विश्वनाथ महाविद्यालयका अध्यक्ष डा. चिन्तामणि शर्मा, भारतीय गोर्खा परिसंघका सभापति श्री नित्यानन्द उपाध्याय, कार्बी छात्र संघका उप-सभापति श्री दिनेश तेरन, राभा छात्र संघका सहकारी सम्पादक श्री हितेश राभा, टाई-आहोम छात्र संघका सभापति श्री मिलन बुढागोहाइ, भारतीय गोर्खा परिसंघ असम प्रान्तका सभापति श्री अमर अधिकारी, वरिष्ठ सम्वाददाता श्री अतनु भुञा, बिशिस्ट समाजसेवक श्री जयन्त कुमार डेका लगायतको उपस्थिति थियो, जसले कार्यक्रमलाई गौरवमय बनायो।

अखिल असम गोर्खा छात्र संघका मूल-सचिव श्री नुमल छेत्रीद्वारा संचालन गरिएको यस कार्यक्रममा प्रमुख अतिथिहरूले भाइटीकाको सांस्कृतिक महत्त्वबारे आफ्ना विचार राखे। अन्त्यमा, आग्सुका सभापति श्री सुनील कुमार छेत्रीले भाइटीकालाई असमभरका सबै जाति-जनगोष्ठीहरूसँग एकतामा जोड्ने संकेत गर्दै सबै जिल्लामा सामूहिक भाइटीका आयोजनालाई निरन्तरता दिने वाचा गरे।

विभिन्न जिल्लामा सामूहिक भाइटीका कार्यक्रमहरू सम्पन्न सामूहिक भाइटीकाको यस भव्य उत्सवले सम्पूर्ण असममा गोर्खाहरुको एकता र भाइचारालाई प्रकट गरेको छ। राज्यभरका विभिन्न जिल्लाहरूमा यस वर्षको भाइटीका उत्सव विभिन्न स्थानहरूमा निम्नानुसार मनाइएको थियो:

1. शोणितपुर जिल्ला समितिको आयोजनामा: रौमारीस्थित हरि हर मन्दिर प्रांगणमा भाइटीका गरियो।

2. विश्वनाथ जिल्ला समितिको आयोजनामा: राजगढ, मइनापुरस्थित आग्सु भवन प्रांगणमा भाइटीका सम्पन्न गरियो।

3. तामुलपुर जिल्ला समितिको आयोजनामा: भाउरागुरी प्राथमिक विद्यालय प्रांगणमा भाइटीका कार्यक्रम सम्पन्न भयो।

4. तिनसुकिया जिल्ला समितिको आयोजनामा: तिनसुकियास्थित बहादुर चारआलीमा भाइटीका सम्पन्न गरियो।

5. पश्चिम कार्बी आङलङ जिल्ला समितिको आयोजनामा: डिख्लेम टिला नेपाली बस्तीमा भाइटीका सम्पन्न गरियो।

6. उदालगुरी जिल्ला समितिको आयोजनामा: टंला स्थित दुलियापारा शिव मन्दिर प्रांगणमा भाइटीका सम्पन्न गरियो।

7. बाक्सा जिल्ला समितिको आयोजनामा: भुटानखुट्टी गाउँ उन्नयन समितिको प्रांगणमा भाइटीका सम्पन्न गरियो।

8. तिनसुकिया जिल्ला अन्तर्गत माधवपुर-वबदुमसा शाखा समितिको आयोजनामा: माधवपुर गोर्खा शिव मन्दिर प्रांगणमा भाइटीका गरियो।

9. बाक्सा जिल्ला अन्तर्गत मध्य बाक्सा आञ्चलिक समितिको आयोजनामा: खैरेनी गोर्खा चोकमा भाइटीका सम्पन्न गरियो।

10. तिनसुकिया जिल्ला अन्तर्गत लखिपथार शाखा समितिको आयोजनामा: लखिपथार गाउँ पंचायतको प्रेक्षागृहमा भाइटीका गरियो।

अखिल असम गोर्खा छात्र संघद्वारा आयोजित यी सबै कार्यक्रमहरूले गोर्खाहरुको सांस्कृतिक, धार्मिक, र सामाजिक एकतालाई अझ सुदृढ बनाएको छ। यो भाइटीका उत्सवले असमका गोर्खाहरुको समुदायलाई मात्र नभई अन्य जाति-समुदायहरूसँगको भाइचारो सम्बन्धलाई पनि मजबुत बनाउने महत्त्वपूर्ण सन्देश दिएको छ।